Jetz isch die bsinnlichi Adväntszyt da
und Geburt Christi isch doch so nah
Damals isch de Josef mit de Maria uf Suechi nach ere Herbärg gsi
doch a jedere Hustüre heds gheisse, mier hend kei Platz für sie
Dusse ufem Fäld heds en Schafhärde mit Hirte gha
die beide sind eso müed, doch sie müend witer gah
es isch grüsli chalt, und sie suechid überall
do plötzlich hend sie gfunde en alte Stall
De Josef macht die Stalltüre uf, doch da sind sie nid allei
en Ochs und en Esel isch da au dehei
Denn wird es ganz still, d Familie isch glücklich und froh
Um Mitternacht isch denn s Jesuschind uf d Wält cho
Ja en grosse helle Stärn lüchtet i dere heilige Nacht
und vo de himmlische Ängle wird dä idyllischi Ort bewacht
Die drü Könige vom Morgenland hend die frohi Botschaft vernoh
und sind mit eme Köstliche Gschänk a de heilige Ort cho
Jetzt isch de Sohn Gottes vo Behtlehem da
wo s Volk uf de ganze Wält Wiehnacht fire cha
Uf de Bärge und im Tal hed es Schnee
und innere klare Nacht chamer tusig Stärne am Himmel gseh
Da und dete wird vorbereitet, ja en bsundere Duft heimelet jedes a
wo mer Mailänderli, Brunsli, Chräbäli und au Zimtstärne bache cha
Überall tuet mer schöni gschmückti Tannebäum betrachte
und cha frohi und lüchtendi Kinderauge beobachte
Am Abig, wenn es dunkel wird, zündet mer gärn en Kerze a
die en harmonischi Stimmig i d Stube bringe cha
Doch jetz isch de Wiehnachtsabig da
wo mer gemeinsam vor em gschmückte Christbaum fire cha
Au wird da und dete musiziert mit ere sanfte Melodie
denn gits es feins Ässe, es sind alli gärn derbi
Doch jetz wünsche ich allne Lüt es frohs Wiehnachtsfäscht
und es gsunds und glücklichs neus Jahr 2014
Alice Greter im Pflegheim Höchweid, Ebikon
