Zum Samichlaus
Jetzt isch de erschti Adväntsunntig, ja au de Samichlaus isch da
denn tuet är vor de Chiletüre e sinnvolli Asprach ha
Är brichtet vom St. Niklaus, vo dem guete Maa
dass är i der damalige Zyt fürs Volk viel Guets het ta
Ufem Chileplatz heds rächt viel Lüt, doch es isch ei Rueh
denn Gross und Chli losed i dene idrückliche Worte guet zue
denn tuet de Samichlaus mit sim Gefolge de Platz verloh
um nachhär gmeinsam dur die winterliche Strasse z goh
Vorus lauft de Samichlaus mit em Eseli, au d Zwärgli sind derbi
das cha für die Chindergruppe es wunderschöns Erläbnis si
De Knächt Ruprächt, Diener und d Schmutzli sind bereit
au die kunstvoll-lüchtende Nifele wärdet durs Dorf Äbike treit
Einigi Manne tüent Geisle eso schwungvoll dur d Luft schloh
und die andere löhnt ihri Trichle im Rhyhtmus erklinge lo
Ja d Chlausegsellschaft tuet sich vorbereite
natürlich wärdet sie mit ihrem Gefolge begleitet
Bsunders gärn tuet die Gruppe i d Familie zu de Kinder gah
denn die lüchtende Auge strahlet de Samichlaus eso liebevoll a
Au die Behinderte in Rathuse tuet mer ufsueche
d Lüt wärdet beschänkt mit Mandarine, Gritibänz und Läbchueche
Au im Pflegheim hend alli Bewohner freud wenn d Samichlausgruppe chunt
das git für alli en einmalig frohi und gmüetlichi Stund
Do dörfed mir gmeinsam fröhlich si
und jedes isch au gärn derbi
Mit eme liebe Gruess
Alice Greter, Pflegheim Höchweid, Ebikon