Am Frytig de 13. Juni isch en bsundere Glückstag erwacht,
au d’Sunne hed scho am Morge früeh eso fründlich glacht.
Da dörfed mir Bewohner ufene schöni Reis gah,
wo mer sich doch au vo Härze freue cha.

Nach em Mittagässe punkt eis, tuet en spezielle Car vor em Heim stah,
so, dass au d Bewohner mit de Rollstüehl uf d Reis chönd gah.
Ja üsi Begleitpersone tüend für alli guet Sorge,
und mir Bewohner fühlet üs eso richtig geborge.

Scho fahrt de Chauffeur los, und mier tüent Äbike verlah,
um nachhär denn i die wältberüehmti Stadt Luzärn z gah.
Da chamer wieder einisch die bluemegschmückti Kappelbrugg gseh
und au die romantische Dampfschiff ufem See.

Ja mir sind en gmüetlichi, frohi Gsellschaft, und fahret in aller Rueh
richtig Bundesplatz, Kriens, Rängloch u denn gäge Malters zue.
Witer gahts dur die schöni Gägend, ja überall weidet Ross und Veh,
in Werthenstein hed mer die idyllischi Klosterchile ufem Felse obe gseh.

Denn Wolhuse und dur das Städtli Willisau verbii –
und scho sind mir bi dem erläbnisriche Burehof Burgrain gsii.
Da sitzet alli ane Tisch, und mer tuet üs härzlich begrüesse,
wo mer ganz gmüetlich es feins Dessert dörfed gniesse.

Nachhär chund en Herr und tuet über de bsunderi Bioburehof brichte.
Ja es sind interessanti, lehrrichi Gschichte.
Zum Bispiel dass sie gsundi biologischi Läbesmittel tüend produziere,
und alli Lüt vo dene guete Produkt chönd profitiere.

Ja, das isch es Schwyzer landwirtschaftlichs Museum, das muess mer gseh,
näbscht Vieh, Kälbli, Chlitier, Obstsorte, Getreide und no einiges meh.
Au en Schaukäserei, wo mer vor Ort es feins Racclet gniesse cha –
i de Gaststube chamer guet ässe, usem Holzofe knusperigs Brot ha.

Schnell isch die Zyt verbi und mir müend as Heigah dänke,
üse humorvoll Chaffeur tuet sis Stürrad sicher länke.
Uf de Fahrt tuet är üs uf Sehenswürdigkeite ufmerksam mache,
au singe und öppe en sanfte Witz verzelle, de chamer wieder lache.

Scho fahret mir bi Ettiswil, Rathusetunnel und Bueri verbi,
und sind denn zfriede und glücklich wieder ds Äbike im Pflegheim gsi.
Jetz git es nume eis: de Begleitpersone und im Chauffeur
und au im Pflegeheim es härzlichs «Danke» d säge!

Alice Greter – Pflegeheim Höchweid