Jetzt isch die schöni Wiehnachtszit do, wo mer sich gägesietig en chliini Freud bereite cha
Advänt heisst sich uf die heiligi Ziit vorbereite, gueti sinvolli Gedanke möge üs begleite
Im Zentrum Höchweid hed en stimmigsvolle Advänt de Afang gno, en märlihafte Liechterglanz, ja mer isch nid usem Stuune cho
E Wiehnachtsmärt mit allem Drum und Dra, das brucht en Organisation, dass mer so öpis mache cha
Zwe bsunderi Täg hend mir erläbt, zahlriichi Lüüt sind is Zentrum Höchweid cho
Die viele lüchtende Latärne und die wärmendi Füürstell sind s A und O
Die idyllischi, romantischi Stärnenacht hed das wunderschöne Häxehüsli zum glitzere bracht
Jo, ame Wiehnachtsmärt gits schöni Sache, wo mer inere liebe Person en Freud demit cha mache
Die dekorative Ständ locket zum chaufe a, au es guets Adväntsgsteck, wo mer sälber mache cha
Und d Chuchi hed sich öpis ifalle la, chasch vom Raclett oder Fondü, Glüewii und au anderi Sache ha
En wiehnachtliche Kinderuftritt in schönschter Harmonie, d Jungmusiker mit ihrem Könne sind derbi
E sone Adväntszauber mag en positivi Wirkig ha, wo Jung und Alt sich begägne cha
Doch jetzt chund de chalti Winter uf üs zue, vieli Lüüt sind uf de Flucht und findet e kei Rueh
Mer duet sie eifach us ihrem Land vertriebe, sie würdet so gärn im Friede ame sichere Ort blibe
Au Josef und Maria hend en Wohnort gsuecht überall, müed und erschöpft hend sie denn gfunde en alte Stall
Ja es isch zmitzt im Winter und es hed Schnee – und da isch das gröschti Wunder vo de ganze Wält gscheh
D Maria hed de Sohn Gottes gebore i dere heilige Nacht, schnell hed mer über s ganzi Land die frohi Botschaft bracht
Damals isch en grosse Stärn über dem Stall blibe stah, als erschti düend d Schafhirte dete ane gah
Au die drü Könige hend sich schnell uf de Wäg gmacht und dem göttliche Chind ihri Gschänk bracht
Doch jetzt wärdet im Liechterglanz sanfti Melodie erklinge, wo en frohi, fiirlechi Wiehnachtsstimmig für alli hüt mögid bringe!
Von Alice Greter, Zentrum Höchweid Ebikon
