Jetz isch es kalt, de schneebedeckti Winter isch cho
und au die kommendi Wiehnacht, das isch eso
Natürlich isch au de Advänt da
wo mer sich im Stille uf die heiligi Zit vorbereite cha
Die hell belüchtete Hüser kündet es bsunders Fäscht a
überall wird baschtlet und gschaffed, ja mer möcht alles fertig ha
D Husfraue hend sehr viel z tue, das mues mer gseh:
Guetzli bache, Zimtstärn, Brunsli, Mailänderli, Chräbali und no meh
Da und dete gits en Wiehnachtsmärt, wo mer Diverses chaufe cha
Im Zentrum Höchweid het mer zwei Tag lang e Adväntszauber gha
Gasch uf d Garteterrasse, trifft mer en himmlischi Atmosphäre a
mit Häxehüsli, Tannebäumli, Latärne und tusig Liechter, wo mer stune cha
Zum Ässe heds Fondü, Bratwürst, Servelat, Raclette, au feini Suppe sogar
Drüberus Öpfelchüechli darf mer no gniesse, das isch wunderbar
D Jungmusiker hend a zwei Tage kunstvolli Darbietige bracht
mit ihrne Instrumänte i vielne Zuehörer e grossi Feud gmacht
Zum Adväntszauber sind sehr vieli Lüt da ane cho
au Verchaufsständ hets gha, es het sich glohnt, das isch eso
Und Kinder hend i de Höchweid dörfe Läbchuechehüsli mit Verzierig mache
Mit lüchtende Auge dörfed sie ihres Kunstwärk hei näh nach em Bache
Da und det möget Wiehnachtskonzärt frohlockend erklinge
und en friedlichi harmonischi Stimmig bringe
Leider müend vieli Lüt wägem Krieg und Terror Angst ha
Drum sind sie uf der Flucht und möchtet ane sichere Ort gah
Au d Maria und de Josef sind uf der Suechi nach ere Herberg gsi
da und dete hend sie aklopft, doch e kei Mänsch hed Platz gha für sie
Sie suechet witer und gsehnd en Stall, en Ochs und en Esel isch da
Das isch es Glück, wo mer sich ufwärme cha
Doch i dere heilige Nacht isch gebore das göttliche Jesuschind
d Schafhirte gsehnd de grossi Stärn, sie göhnt go luege gschwind
D Maria tuet ihres Himmlische Chind uf d Arme näh
de Josef und d Maria möchtet ihm vo Härze viel Liebi gäh
Au die drü Könige vom Morgeland sind a de heilige Ort cho
Sie hend das Chind gwürdigt und es Gschänk mitgnoh
Schnell hed mer die frohi Botschaft überall vernoh
dass Christus de Sohn Gottes, uf d Wält isch cho
Us dem Grund ghört mer i de Cafeteria sanfti Musig erklinge
die vorem lüchtende Tannebaum en friedlichi Stimmig mögi bringe
Jetz dörfed mir gmeinsam fire das schöne Wiehnachtsfäscht
bime feine Ässe mit üsne liebe Angehörige als üsi Gäscht
Ich möchte allne Lüt en schöni Wiehnacht und es guets neus Jahr 2017 wünsche
Alice Greter
Zentrum Höchweid Äbike
